उदयपूरसू ढोला बीज मंगाया ठाण रूपाओ,
आलीजिरी लिंबडी म्हाका राज।
माखणीयारो ढोला पाळ बांधाय, दूधान सिंचाओ,
आलीजिरी लिंबडी म्हाका राज।
उगी लिंबडी घेर घुमेर, कोइर मती टोडो,
आलीजिरी लिंबडी म्हाका राज।
नणंदलबाई तोड्या लिंबाडिरा पान,
देवरजी छंदगाळ्यो तोडी काची कांबळीजी म्हाका राज।
नणंदलबाई ढोला सासरीए पाहुचाय,
देवरीया छंदगाळ्यान ईंदरगडरी चाकारीजी म्हाका राज।
नणंदलबाई ढोला सासुजीरा लाड,
देवरीयो छंदगाळ्यो माउजीरा लाडलाजी म्हाका राज।
बेठा छेला मारू दुकानारे माय,
कागदिया लिख आया ईंदरगडरी चाकारीजी म्हाका राज।
कागज सुंदर गोरी बचोयन जाय,
छाती भरीजे उलटोजी म्हाका राज।
छाती छेला मारू हिरासु जडाय,
हिवडो जाडाओ माणीक मोत्यासुजी म्हाका राज।
पेली ओळग ढोला सुसराजिन मेल,
आबके उन्हाळे चंदनचोक भेजी म्हाका राज।
सुसराजिन गोरी मेल्योयन जाय,
म्हारा न सरीसा मोबी डिका जी म्हाका राज।
दुजी ओळग ढोला जेठाजिन मेल,
आबके चौमासो रंगभर मेलामेजी म्हाका राज।
जेठजीरी गोरी बडका बोली नार,
उठने परभाते हमसू कळ करेजी म्हाका राज।
इगणी ओळग ढोला देवरजिन मेल,
अबके सियाला सुखभर सेजमेजी म्हाका राज।
देवरजीरी गोरी बाळी भोळी नार,
उथोडी कुमळावे गुलरा ऊलज्युंजी म्हाका राज।
चोथी ओळग ढोला ननंदोईजिन मेल,
अबके तिज्यान भंवर घरा बसोजी म्हाका राज।
नणदोयारी जात कुजात,
नणंदल ली कहीजे सावणीयारी तिजणीजी म्हाका राज।
पाचवी ओळग ढोला हाळिकान मेल,
अबके तिज्याने भेळ पिंडो पासश्याजी म्हाका राज।
हाळीकाने गोरी मेल्योयन जाय,
ब्यारा बायोडा मोती निपजेजी म्हाका राज।
छट्टी ओळग ढोला राईकाने मेल,
अबके तिज्याने हिंडो खेलश्याजी म्हाका राज।
सुता छेलामारू सुखभर निंद,
रतन राईको हेलो पाडीयोजी म्हाका राज।
मरजो राईका थारोडीजी नार,
भंवर बिछवा थे घाल्याजी म्हाका राज।
मती देवो सुंदर गोरी राईकाने गाळ,
थाराए सरीसी राईकारी गोरडीजी म्हाका राज।
हंसहंस सुंदर गोरी देवो म्हान साख,
जीव चित्त लागी ईंदरगडरी चाकरीजी म्हाका राज।
सिखज छेला मारू दियोयन जाय,
हिवडो भरीजे छाती उलटेजी म्हाका राज।
छाती सुंदर गोरी रतन जडाय,
हिवडो जडावा माणीक मोत्यासुजी म्हाका राज।
No comments:
Post a Comment