पनघट

म्हान घडो उचाता जावोजी ।
जाबाला मोटयार जरा ओल्यांनी आवीजी।  

इतरा दुख थे क्यानै पावोजी ।
नहीं ऊँचे तो मोटी मटकी कयने ल्यावोजी।  टेर।

सासू म्हारी है जी खोटी दुख देवे है म्हाने।
परण्यो  है नादान हाल म्हारी सांच बतावू  थाने
म्हारा मन की सुणता जावोजी । । जाबाला मोटयार ...  

परण्या का मै भोला भाँदू साथै चलो म्हांके।
म्हाकी मां है भोली ढाली वणाजासी थांके ब्यांके।
ऐसों मोको मती गमावोजी । 1 नहीं ऊंचे तो ... 

देवरियो म्हारो घर मांही रोज लडे  है म्हासे ।
नणदल गाल्यां काढ़े  दिन भर नहीं धापे लड़बा से
म्हारे थे हो अब मन भावोजी ।। जाबाला मोटयार ...   

म्हाका छोटा भाई सुंदर रहें कलकत्ता मांई ।
बैनड म्हाकी  गई सासरे बडा घरां परणाई ।
चालो  अब क्यों देर लगावोजी ।। नहीं ऊंचे तो ... 

मटकी फोड़ू पणघट ऊपर देखो सब नर नार।
छोटा कंथ कौ खातिर जावू  मैं इण छैला लार।
आवो चालों मौज उड़ावोजी ।। जाबाला मोटयार ...  

कहे माधोसिंह जोडी प्यारी सबने लाग्यो पसंद।
दुश्मन  छाती कूटे म्हेंतो सदा करां आनंद ।
महिमा गुरू नंन्द की गावोजी ।। नहीं ऊंचे तो ...